ബത്തേരി: ബത്തേരി നമ്പിക്കൊല്ലി അമ്പലപ്പടിയിൽ ലഹരിയുടെ ഉന്മാദത്തിൽ അച്ഛനും മകനും ചേർന്ന് മണിക്കൂറുകളോളം ഭീകരാന്തരീക്ഷം സൃഷ്ടിച്ചു. നമ്പിക്കൊല്ലി സ്വദേശി കീറ്റപ്പള്ളി സണ്ണിയും മകൻ ജോമോനുമാണ് അക്രമം അഴിച്ചുവിട്ടത്. സ്വകാര്യ ബസ് ഉൾപ്പെടെ അഞ്ചോളം വാഹനങ്ങൾ അടിച്ചു തകർത്തു. വിവരമറിഞ്ഞ് സ്ഥലത്തെത്തിയ നൂൽപ്പുഴ പോലീസ് സംഘത്തിന് നേരെയും ഇരുവരും ആക്രമണം തുടർന്നു. ചുറ്റിക ഉപയോഗിച്ച് പോലീസ് വാഹനത്തിന്റെ ചില്ല് തകർക്കുകയും പോലീസുകാർക്ക് നേരെ അരിവാൾ വീശുകയും ചെയ്തു.
ഈ ആക്രമണത്തിൽ ഒരു പോലീസ് ഉദ്യോഗസ്ഥന്റെ കൈവിരലിന് പരിക്കേറ്റതായും റിപ്പോർട്ടുകളുണ്ട്. ലഹരിയുടെ ഉന്മാദത്തിലായിരുന്ന ഇരുവരെയും ഏറെ പണിപ്പെട്ടാണ് പോലീസ് പിന്നീട് കീഴ്പ്പെടുത്തിയത്. സംഭവത്തിൽ നൂൽപ്പുഴ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. അക്രമത്തിന് പിന്നിലുള്ള യഥാർത്ഥ കാരണം എന്താണെന്നും പോലീസ് അന്വേഷിക്കുന്നുണ്ട്. പ്രദേശത്ത് ഏറെ നേരം ഭീതിജനകമായ അന്തരീക്ഷം നിലനിർത്താൻ ഇവരുടെ പ്രവൃത്തി കാരണമായി.
