പുല്‍പ്പള്ളി: മദ്യലഹരിയില്‍ ബഹളം വെച്ച് അക്രമ സ്വഭാവം കാണിച്ച യുവാക്കളെ അന്വേഷിച്ചെത്തിയ പോലീസുകാര്‍ക്ക് മര്‍ദനമേറ്റതായി പരാതി. രാത്രി ഡ്യൂട്ടിയിലുണ്ടായിരുന്ന പുല്‍പ്പള്ളി സ്റ്റേഷനിലെ സിവില്‍ പോലീസ് ഓഫീസര്‍മാരായ രഞ്ജിത്ത്, ജോബിന്‍, അസീസ് എന്നിവര്‍ക്കാണ് മര്‍ദനമേറ്റത്. സംഭവവുമായി ബന്ധപ്പെട്ട് മീനംകൊല്ലി സ്വദേശികളായ ചെട്ടിയാംതുടിയില്‍ സഫ്വാന്‍ (20), മണപ്പാട്ട് പറമ്പില്‍ നിധിന്‍ (28) എന്നിവരെ അറസ്റ്റ് ചെയ്തു.
അര്‍ധരാത്രി മദ്യപിച്ച് ബഹളമുണ്ടാക്കിയവരെ അന്വേഷിച്ചെത്തിയപ്പോഴായിരുന്നു പ്രതികള്‍ പോലീസിനെ അക്രമിച്ചത്. ബുധനാഴ്ച രാത്രി 11.45 ഓടെയാണ് മീനംകൊല്ലിയിലായിരുന്നു സംഭവം. പിന്നീട് കൂടുതല്‍ പോലീസെത്തിയാണ് അക്രമികളെ കീഴടക്കിയത്.
