ബത്തേരി: കാട്ടില്‍ കയറി വനാതിര്‍ത്തി ഉന്നതികളിലും മറ്റും മദ്യം വില്‍ക്കുന്നത് തടഞ്ഞതിലുള്ള വിരോധത്താല്‍ ഫോറസ്റ്റ് വാച്ചറെ മര്‍ദ്ദിച്ച് പരിക്കേല്‍പ്പിച്ച കേസില്‍ മൂന്ന് പേരെ ബത്തേരി പോലീസ് പിടികൂടി. ചീരാല്‍, രവീന്ദ്രന്‍ (23), കല്ലൂര്‍, രാജു (36), കല്ലൂര്‍ പ്രകാശന്‍ (20) എന്നിവരെയാണ് ബത്തേരി പോലീസ് അറസ്റ്റ് ചെയ്തത്. ഇന്നലെ വൈകിട്ടോടെ നൂല്‍പ്പുഴ പണപ്പാടി എന്ന സ്ഥലത്ത് വെച്ചായിരുന്നു സംഭവം. ബത്തേരി ഫോറസ്റ്റ് റേഞ്ചിലെ താല്‍ക്കാലിക വാച്ചറെ ഇവര്‍ സംഘം ചേര്‍ന്ന് വടി കൊണ്ടും കത്തി കൊണ്ടും അക്രമിച്ചതായാണ് പരാതി. ഗുരുതര പരിക്കേറ്റ വാച്ചര്‍ ചികിത്സയില്‍ കഴിയുകയാണ്.
