തിരുവനന്തപുരം: കേരള സർവകലാശാലയിൽ ഈ വർഷം തന്നെ നാല് വർഷ ബിരുദ കോഴ്സുകൾ തുടങ്ങും. സർവകലാശാല നേരിട്ട് നടത്തുന്ന നാല് കോഴ്സുകളാണ് പുതിയ രീതിയിൽ തുടങ്ങുന്നത്. സംസ്ഥാനത്ത് ആദ്യമായാണ് ഒരു സർവകലാശാല നാലുവര്‍ഷ ബിരുദ കോഴ്സ് ആരംഭിക്കുന്നത്.
ലാംഗ്വേജസ് ആൻഡ് കമ്മ്യൂണിക്കേഷൻ സ്കിൽ, പൊളിറ്റിക്സ് ആൻഡ് പബ്ലിക് അഡ്മിനിസ്ട്രേഷൻ എന്നിവയിൽ ബി എ ഓണേഴ്സ് കോഴ്സും ലൈഫ് സയൻസിൽ ബിഎസ്സി ഓണേഴ്സ് കോഴ്സും സർവകലാശാല പഠന വിഭാഗങ്ങളിൽ തുടങ്ങുമെന്ന് വൈസ് ചാൻസലർ ഡോ. മോഹൻ കുന്നുമ്മൽ വാർത്താസമ്മേളനത്തിൽ അറിയിച്ചു.
സ്വാശ്രയാടിസ്ഥാനത്തിൽ സർവകലാശാല നടത്തുന്ന യൂണിവേഴ്സിറ്റി ഇൻസ്റ്റിറ്റ്യൂട്ട് ഓഫ് ടെക്നോളജി (യുഐടി)യിൽ നാല് വർഷ ബി കോം (പ്രൊഫഷണൽ) ഓണേഴ്സ് കോഴ്സും ഈ വർഷം തുടങ്ങും. നാല് വർഷ ബിരുദ കോഴ്സുകൾ ഈ വർഷം തുടങ്ങാൻ അഫിലിയേറ്റഡ് കോളജുകളിൽനിന്ന് താൽപര്യപത്രവും ക്ഷണിച്ചിട്ടുണ്ട്. അടുത്തവർഷം മുഴുവൻ കോളേജുകളിലും നാല് വർഷ കോഴ്സുകൾ തുടങ്ങാനാണ് തീരുമാനം. ഈ വർഷം തുടങ്ങുന്ന കോഴ്സുകൾ ഏത് പഠന വകുപ്പുകൾക്ക് കീഴിലാണെന്നത് വൈകാതെ തീരുമാനിക്കും.
സംസ്ഥാനത്ത് ഉന്നത വിദ്യാഭ്യാസ പരിഷ്കരണ കമ്മീഷന്റെ ശുപാർശയെ തുടർന്നാണ് നാല് വർഷ ഓണേഴ്സ് ബിരുദ കോഴ്സുകൾ തുടങ്ങുന്നത്. മൂന്നാം വർഷത്തിൽ നിശ്ചിത എണ്ണം ക്രെഡിറ്റ് ആർജിച്ച് വിദ്യാർത്ഥിക്ക് പുറത്തുപോകാനും (എക്സിറ്റ്) അവസരമുണ്ടാകും. ഇവർക്ക് നിലവിലുള്ള ത്രിവത്സര ബിരുദമായിരിക്കും നൽകുക. ഗവേഷണ, ഇന്‍റേൺഷിപ് പ്രവർത്തനങ്ങൾക്ക് ഊന്നൽ നൽകുന്ന നാലാം വർഷം കൂടി പൂർത്തിയാക്കുന്നവർക്ക് ഓണേഴ്സ് ബിരുദവും നൽകും. ഓണേഴ്സ് ബിരുദം നേടുന്നവർക്ക് ലാറ്ററൽ എൻട്രി വഴി ഒരു വർഷം കൊണ്ട് പി ജി പൂർത്തിയാക്കാനും അവസരമൊരുക്കും.
