പനമരം: പനമരം പോലീസ് സ്റ്റേഷന്‍ പരിധിയിലെ അഞ്ചുകുന്ന് വേങ്ങരംകുന്ന് കോളനിയിലെ യുവതിയെ വധിക്കാന്‍ ശ്രമിച്ച യുവാവിനെ പോലീസ് അറസ്റ്റ് ചെയ്തു. ഇതേ കോളനിയിലെ കണ്ണന്‍ 27 നെയാണ് പനമരം പോലീസ് ഇന്‍സ്‌പെക്ടര്‍ വി സിജിത്തും സംഘവും അറസ്റ്റ് ചെയ്തത്.
ഇന്നലെ രാത്രി 8 മണിയോടെ മദ്യപിച്ച് വീട്ടില്‍ വന്ന കണ്ണന്‍ ഭാര്യാ സഹോദരിയായ ശാന്ത (45)യുമായി വഴക്കുണ്ടാക്കി അടക്കാ കത്തികൊണ്ട് മുറിവേല്‍പ്പിച്ച് വധിക്കാന്‍ ശ്രമിക്കുകയായിരുന്നു.
വിവരം അറിഞ്ഞയുടന്‍ സമയോജിതമായി ഇടപെട്ട പനമരം പോലീസ് ശാന്തയെ മാനന്തവാടി മെഡിക്കല്‍ കോളേജിലെത്തിച്ച ശേഷം പ്രതിയെ കസ്റ്റഡിയില്‍ എടുക്കുകയായിരുന്നു. കണ്ണന്‍ പ്രായപൂര്‍ത്തിയാകും മുന്‍പ് അച്ഛന്‍ കുളിയനെ കൊലപ്പെടുത്തിയ കേസിലെ പ്രതിയായിരുന്നു. പിന്നീടും കണ്ണന്‍ പല കേസുകളിലുംപെട്ടിരുന്നു. കോളനിയിലെ സ്ഥിരം പ്രശ്‌നക്കാരനായ പ്രതിക്കെതിരെ ശക്തമായ നിയമ നടപടികള്‍ സ്വീകരിക്കുമെന്ന് പനമരം പോലീസ് സ്റ്റേഷന്‍ ഇന്‍സ്‌പെക്ടര്‍ അറിയിച്ചു. എസ്.ഐ കെ ദിനേശന്‍, എസ് സി പി ഒ അബ്ദുര്‍അസീസ്, സി പി ഒ വിനായകന്‍, രാതീഷ് ശേഖര്‍ എന്നിവരും പോലീസ് സംഘത്തില്‍ ഉണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
